پرگٹ سنگھ ستوَج

پرگٹ سنگھ ستوَج پنجاب دے سنگرُور ضلع دے اک دور دُراڈے پنڈ دے سادھارن کسانی پروار وچ 1981 وچ جنمیا سی۔گریجویشن توں پچھوں اوہ پرائمری سکول ادھیاپک بن گیا سی اتے سال 2006 توں ہن تک ایہو ادھیاپن دا کارج کردا آ رہا ہے۔نوکری دے نال نال ہی اُسنے پنجابی اتے اتہاس دے وشے وچ ایم ۔اے دی ڈگری حاصل کیتی اے۔لکھنا اُسنے چھوٹی عمر ہی شروع کر دتا سی اتے اک کہانی دے رُوپ وچ اُسدی پہلی رچنا 2002 وچ چھپی سی۔ستوَج دی پہلی پلیٹھی دی پُستک "تیرا پنڈ" کاو سنگریہہ سی،جسدا پرکاشن 2008وچ ہویا۔ پر ایس توں مگروں اُسنے اپنا سارا دھیان گلپ رچنا ول موڑ دتا۔ہن تک اُسدے تن ناول اتے اک کہانی سنگریہہ پرکاشت ہو چُکے ہن۔اُسدے پہلے دو ناولاں "بھاگو(2009 ( اتے "تیویاں"(2012) دا پنجابی ساہت جگت وچ بھرپور سواگت ہویا ہے اتے دویں ہی ناول اک توں ودھ ایڈیشناں وچ چھپ چُکے ہن۔صوبائی اتے ستھانک پدھر اُتے تاں لیکھک وجہوں پرگٹ سنگھ ستوَج دی پچھان چھیتی ہی ہون لگی سی اتے کئی انعام سنمان اُسدی جھولی پئے۔پر اُسدی سرجناتمک پرتبھا نوں قومی پدھر اُتے پروانی اُدوں ملی جدوں ناول"تیویاں" لئی اُسنوں سال 2012 وچ بھارتی ساہت اکادمی ولوں "یُوا ساہتکار" دے وکاری انعام چُنیا گیا۔سال 2014 وچ چھپی اُسدی کہانیاں دی کتاب"غلت ملت زندگی" دا وی چنگا سواگت ہویا سی اتے ایس پُستک وچلیاں کئی کہانیاں ہندی اُردو تے راج ستھانی وچ انواد ہو کے چُھپ چکیاں ہن۔ ناول "بھاگو" اتے کہانیاں دی پُستک "غلت ملت زندگی" دا شاہ مُکھی وچ لپی انتر ہو چُکیا ہے۔پرگٹ سنگھ ستوَج دیاں سمُچیاں لکھتاں کسانی سماج اتے نمن مدھ ورگ دے جیون دیاں پرتاں دی ڈوہنگی پچھان دے نال نال بولی شیلی اُتے مُہارت اتے گلپی جُگتاں دی کُشل ورتوں دا پرمان دنیدیاں ہن۔اُس دا تیجا اتے سجرا ناول "خبر اک پنڈ دی" سال 2016 وچ چھپیا سی،جس نوں پنجابی ساہت لئی قومانتری پدھر دے سبھ توں وڈے "ڈھاہاں انعام" لئی چُنیا گیا ہے۔