. ا۔جیوری
- ہر سال تن ممبری تن جیوریاں نیوکت کیتیاں جاندیاں ہن۔ گورمکھی اتے شاہ مکھی لپیاں وچوں سیمی فائینلسٹاں نوں نردھارت کرن لئی دو جیوریاں ستھاپت کیتیاں جاندیاں ہن۔ ایہناں نوں “گورمکھی جیوری” اتے “شاہ مکھی جیوری” کیہا جاندا ہے۔ ایہہ دوویں جیوریاں آپواپنیاں لپیاں وچوں سنبھاوی جیتوآں نوں نردھارت کردیاں ہن۔ چھوٹی سوچی، فائینلسٹ اتے جیتو دی چون کرن لئی اک سینٹرل جیوری دی ستھاپنا کیتی جاندی ہے۔ سینٹرل جیوری دے ممبراں لئی ایہہ ضروری ہے کہ اوہ دوویں لپیاں دیاں کتاباں پڑھن دے یوگ ہون۔
- گورمکھی اتے شاہ مکھی جیوری امیدواراں ولوں نامزد کیتیاں کتاباں وچوں گھٹو گھٹ 3 جاں کل یوگ کتاباں وچوں 20 فیصدی دی چون کرکے ڈھاہاں انعام صلاح کار کمیٹی دے مکھی نوں بھیجدیاں ہن جہڑیاں کہ مکھی ولوں سینٹرل جیوری دے وچارن لئی اگانہہ بھیجیاں جاندیاں ہن۔
- سینٹرل جیوری گورمکھی اتے شاہ مکھی جیوریاں دوارا سفارش کیتیاں کتاباں دی سوچی وچوں گھٹ توں گھٹ 6 اتے ودھ توں ودھ 10 سرلیکھاں دی اک چھوٹی سوچی تیار کردی ہے۔ سینٹرل جیوری اس سوچی وچوں ڈھاہاں انعام دا جیتو اتے دو فائینلسٹاں دی سفارش ڈھاہاں انعام پربندھن ٹیم نوں کردی ہے۔ سینٹرل جیوری ایہہ وی دھیان گوچرے رکھدی ہے کہ تن فائینلسٹاں وچ دوہاں لپیاں دی نمائندگی کیتی گئی ہے۔
- انعام دے انتم نرنے دا اعلان ہون تک جیوری ممبر شپ پوری طرحاں گپت رکھی جاندی ہے۔ صرف سنبندھت جیوریاں دے ممبر، ڈھاہاں انعام صلاح کار کمیٹی دا مکھی اتے ڈھاہاں انعام پربندھن ٹیم دے ممبر ہی جاندے ہن کہ جیوریاں دے انتم گٹھن دے ممبر کون ہن۔ ڈھاہاں انعام صلاح کار کمیٹی جیوری ممبر شپ بارے کمیٹی دے مکھی نوں سجھاء تاں مہیا کردی ہے پر اوہ جیوریاں دے انتم گٹھن بارے نہیں جاندی۔
- سارے جیوری ممبر گپتتا رکھن لئی سہمت ہوندے ہن تاں جو اپنی جیوری دے ممبراں توں علاوہ انعام نال سنبندھت مسلیاں بارے کوئی چرچہ نہ کیتی جا سکے۔ خاص طور تے اوہ اپنی سنبندھت جیوری توں باہر کسے نال وی ڈھاہاں انعام لئی جمع کروائیاں گئیاں کتاباں دا خلاصہ جاں چرچہ نہ کرن لئی وی سہمت ہوندے ہن۔
- جیوریاں بناں کسے بھیدبھاو جویں کہ لیکھکاں دی عمر، لنگ، جنسی روحجان، راشٹری پچھوکڑ، جاتی ،دھرم، نام دی پچھان اتے پچھلیاں ساہتک پراپتیاں ول کوئی دھیان نہ دیندے ہوئے سبھ توں ودھیا کتاباں دی چون کردیاں ہن۔
- جیوریاں دے سارے ممبراں نوں ساریاں کتاباں چھپے ہوئے اتے/جاں الیکٹرانک روپ وچ پجدیاں کیتیاں جاندیاں ہن۔ جیوری ممبر اپنی اپنی جیوری نال سنبندھت لپی وچ ساریاں کتاباں پڑھن لئی ذمہ وار ہوندے ہن۔
- کوئی وی ویکتی لگاتار ہر آؤندے سال جیوری دا ممبر بنے رہن دا حقدار نہیں ہے۔
- جس سال جیوری اتے ڈھاہاں انعام صلاح کار کمیٹی دا کوئی وی ممبر اپنی ذمہ واری نبھا رہیا ہے، اس سال اوہ ڈھاہاں انعام دے وچار ادھین کوئی وی نامزدگی نہیں بھر سکدا۔
ب.لوڑدیاں یوگتاں
- انعام واسطے وچارے جان دے یوگ گورمکھی جاں شاہ مکھی لپی وچ لکھے ہوئے ناول جاں کہانی سنگریہہ پہلی ایڈیشن وچ ہونے لازمی ہن۔ کویتا اتے ہور ودھاواں دیاں رچناواں یوگ نہیں ہن۔ پچھلیاں پرکاشت رچناواں دے پُنر-پرنٹ یوگ نہیں ہن (جدوں تک کہ پہلے سنسکرن دے اُسے سال وچ دوبارہ چھاپیا نہیں جاندا ہے)۔
- -ہریک نامزد کیتی گئی کتاب دی ادھی توں ودھ سمگری نویں پرکاشت ہونی چاہیدی ہے (اُداہرن دے طور ’تے، 51% پہلاں کتاب دے روپ وچ پرکاشت نہیں ہونی چاہیدی، جویں کہ ہور سنگریہہ وغیرہ وچ)۔
- نامزد کیتی گئی کتاب انعام پردان کرن توں پہلے کلنڈر سال وچ پرکاشت ہونی ضروری ہے۔ مثال وجوں سال 2023 دے انعام لئی 2022 وچ چھپی ہونی چاہیدی ہے۔
- لیکھک خود جاں اس دی طرفوں کوئی وی ویکتی سمیت پرکاشک دے کتاب دی نامزدگی بھر سکدا ہے۔ نامزدگی بھرن والے ویکتی کول اس منتوَ لئی سنبندھت لیکھک دی سپشٹ لکھتی اجازت ہونی چاہیدی ہے جہڑی کہ انعام لئی جمع کراؤنی لازمی ہے۔
- نامزد کیتی گئی کتاب وچ ISBN نمبر چھپیا ہونا لازمی ہے۔
- جمع کروائی گئی کتاب لوکاں دوارا واجب سنکھیا وچ ریٹیل آؤٹ لیٹاں تے خریدن یوگ ہونی چاہیدی ہے۔
- -کوئی وی نامزدگی ایوگ نہیں ہوویگی بھاویں اسدے لیکھک نے اس توں پہلاں کوئی ہور ساہتک انعام جتیا ہووے۔
- کتاب دیاں تن پرکاشت ہوئیاں کاپیاں کینڈا وچ ڈھاہاں انعام دے دفتر نوں ڈاک/کوریئر راہیں بھیجیاں جانیاں چاہیدیاں ہن۔ کتاب دا الیکٹرانک روپ (پی ڈی ایف) وی ای میل راہیں بھیجنا ضروری ہے۔
- تصدیق کرن اپرنت کہ کتاب ساریاں یوگتا لوڑاں نوں پورا کردی ہے، اس نوں جیوری ممبراں نوں سونپیا جاویگا۔ نامزدگیاں نوں یوگ جاں ایوگ سمجھن دا پکا/انتم فیصلہ ڈھاہاں انعام صلاح کار کمیٹی دے مکھی اتے ڈھاہاں انعام پربندھن ٹیم دا ہووےگا۔
- ساریاں نامزدگیاں انعامی سال دے 28 فروری تک پہنچنیاں چاہیدیاں ہن۔ اس آخری تاریخ توں بعد ملن والیاں نامزدگیاں نوں ایوگ منیا جاویگا۔
- کسے وی کتاب نوں انعام پردان نہیں کیتا جاویگا جسدے لیکھک دی انعام دے اعلان ہون توں پہلاں موت ہو جاوے۔
- ڈھاہاں انعام دا جیتو ہر پنج سال دی معیاد توں بعد مڑ کے نامزدگی بھر سکدا ہے، جدکہ فائینلسٹ ہر آؤندے سال مقابلے دے یوگ ہن۔
پ -شرطاں
- کتاباں نامزد کرن والے سارے لیکھکاں نوں اک سمجھوتے تے دستخط کرن دی لوڑ ہوندی ہے کہ جے اوہناں دی کتاب ‘جیتو’ جاں “فائینلسٹ” دے طور تے چنی گئی تاں اوہ ڈھاہاں انعام پراپت کرن لئی وینکوور، برٹش کولمبیا، کینڈا وچ آیوجت ڈھاہاں انعام سماروہ اتے لیکھک اتے اوہناں دیاں رچناواں نوں اُجاگر کرن دے کوئی وی سنبندھت سماگماں وچ شامل ہونگے۔ جے کر کوئی لیکھک ایہناں گتی ودھیاں وچ شامل ہون توں اسمرتھ رہندا ہے تاں اوہ لیکھک انعام پراپت کرن دے یوگ نہیں ہووےگا۔
- جیتو اتے فائینلسٹ کتاباں دے لیکھکاں اتے پرکاشکاں نوں کسے وی ڈھاہاں انعام دیاں پرچار سنبندھی گتی ودھیاں لئی کوئی انش، ادھیائے، جاں چھوٹی کہانی نوں نویں روپ وچ پیش کرن دا ادھیکار دین والے اک سمجھوتے تے دستخط کرن دی لوڑ ہوندی ہے۔
- جیتو اتے فائینلسٹ کتاباں دے لیکھکاں اتے پرکاشکاں نوں ڈھاہاں انعام دیاں ہدایتاں انوسار، ڈھاہاں انعام دے لوگو نال بھوکھ دے سارے سنسکرناں نوں چھاپن جاں سٹکر کرن لئی اک سمجھوتے تے دستخط کرن دی لوڑ ہوندی ہے۔
- ہر سال، ڈھاہاں انعام وینکوور، کینڈا وکھے ستمبر مہینے دے شروع وچ اک پریس رلیز راہیں جیتو اتے فائینلسٹاں دا اعلان کردا ہے۔ کتاباں دی چھوٹی سوچی اتے جیوراں دے نام وی اسے سمیں جاری کیتے جاندے ہن۔
- ہر سال، ڈھاہاں انعام ایوارڈ سماروہ وینکوور، کینڈا وکھے اکتوبر دے اخیر توں نومبر دے اخیر دے سمیں دوران آیوجت کیتا جاندا ہے۔ ڈھاہاں انعام جیتو اتے دو فائینلسٹاں لئی وینکوور توں اکنامی واپسی ہوائی یاترا دا خرچہ سہن کردا ہے جس وچ پنج دناں تک وینکوور وچ رہائش، بھوجن اتے آواجائی دا خرچہ وی شامل ہے۔
